चांदीसारखा दिसणारा निकेल, तांबे व जस्त यांचा मिश्रधातू. तांबे व निकेल यांची धातुके – कच्च्या स्वरूपातील धातू – वितळवून चिनी लोक पाकटाँग हा मिश्रधातू तयार करीत असत. मानवाने प्रथम वापरलेल्या मिश्रधातूंपैकी हा एक होय. नंतर त्यात जस्ताची धातुके मिसळून सुधारणा करण्यात आली व तिची ईस्ट इंडिया कंपनीमार्फत यूरोपात निर्यात होऊ लागली. १८४० नंतर ती यूरोपात तांबे, निकेल व जस्त या तीन धातूंचे मिश्रण करून तयार करण्यात येऊ लागली. १९१४ सालापर्यंत हा मिश्रधातू जर्मन सिल्व्हर नावाने परिचित होता. आता त्याला निकेल सिल्व्हर म्हणतात.
यामध्ये १७–३०% निकेल, ५३–६३% तांबे व सुमारे २०% जस्त असते; परंतु सामान्यपणे निकेलाचे प्रमाण वाढविले, तर जस्ताचे प्रमाण कमी करतात. चांदीसारखा शुभ्र रंग, चांगली तन्यता,ओतण्याची, लाटण्याची व तारा काढण्याची सुलभता, अम्ल व गंज प्रतिरोधी या गुणधर्मांमुळे याला उद्योगधंद्यांत महत्त्व प्राप्त झाले. चांदीचा मुलामा देण्यासाठी हा सुयोग्य असा धातू आहे. विद्युत्, विलेपित – विद्युत् प्रवाहाच्या साहाय्याने मुलामा दिलेले – तक्ते, चांदीसारखी दिसणारी शोभिवंत भांडी, रोल्ड-गोल्ड मुलाम्याचे अलंकार, दागिन्यांचे धातुकाम, रासायनिक उपकरणे, सागरी उपकरणातील जोडभाग इत्यादींसाठी याचा उपयोग करतात. याचा लाटीव कठीण अशा पट्ट्या स्प्रिंगा तयार करण्यासाठी वापरतात. या स्प्रिंगा विषेशतः विद्युत् व दूरध्वनी अभिचलित्रामध्ये – विद्युत् प्रवाह नियंत्रित करणाऱ्या साधनामध्ये – वापरल्या जातात.