तानसेन सन्मान, मध्य प्रदेश (Tansen Samman, Madhya Pradesh)

या पुरस्काराचे संपूर्ण नाव ‘राष्ट्रीय तानसेन सम्मान’ असे आहे. भारतीय शास्त्रीय संगीतातील हा एक मानाचा पुरस्कार असून तो मध्यप्रदेश शासनाकडून दिला जातो. भारतीय संगीतातील ऐतिहासिक महत्त्व असलेल्या तानसेन यांच्या नावाने या पुरस्काराची सुरुवात करण्यात आलेली आहे. मध्यप्रदेश शासनाच्या सांस्कृतिक विभागाकडून दिल्या जाणाऱ्या या पुरस्काराचा उद्देश लोकांमध्ये पारंपरिक भारतीय शास्त्रीय संगीताप्रती आवड निर्माण करणे व या क्षेत्रात काम करणाऱ्या व्यक्तींना प्रोत्साहन देणे व त्यांच्या कलेचा सन्मान करणे हा आहे. या पुरस्काराची सुरुवात १९८० मध्ये झाली असून प्रामुख्याने हिंदुस्थानी शास्त्रीय संगीत क्षेत्रातील उल्लेखनीय कामगिरीसाठी हा पुरस्कार दिला जातो. या पुरस्काराचे सुरुवातीचे स्वरूप दोन लाख रुपये रोख, प्रशस्तीपत्र, शाल व श्रीफळ असे होते. आता या पुरस्काराची रक्कम वाढवून ती पाच लाख रुपये करण्यात आलेली आहे. मध्यप्रदेशामध्ये ग्वाल्हेर येथे डिसेंबर महिन्यात होणाऱ्या तानसेन संगीत महोत्सवात देशविदेशातील गायक, वादक आपल्या कलेचे सादरीकरण करतात. हा महोत्सव चार ते पाच दिवस चालतो. या महोत्सवामध्ये हा पुरस्कार देण्यात येतो.

हा पुरस्कार भारतीय संगीत क्षेत्रामध्ये मानाचा समजला जातो. या पुरस्काराने आतापर्यंत पुढील कलाकारांना गौरविण्यात आले आहे.